台語三字詞
#台語三字詞 001-004
頂半身無穿衫：褪腹裼 [thǹg-pak-theh]，也有寫 褪剝裼。
下半身無穿衫：褪褲lān。
規身軀無穿衫：褪光光。
跤無穿鞋襪：褪赤跤 [thǹg-tshiah-kha]。
#台語三字詞 005-010
005.【倒頭栽 tò-thâu-tsai】：華語〔倒栽蔥〕。
006.【倒摔向 tò-siàng-hiànn】：華語〔往後摔倒〕。
007.【吭跤翹 khōng-kha-khiàu】：華語〔四腳朝天〕。
008.【頓塌坐 tǹg-lap-tsē】：華語〔跌屁股〕。也講【tǹg-lak-tsē】、【tǹg-tāng-tsē】、【頓跋坐 tǹg-pua̍h-tsē】、【頓龜 tǹg-ku】。
009.【躄仆向 phih-phak-ànn】：正面向塗跤跋倒，華語〔跌個狗吃屎〕。簡單講做「躄--落去」，類義詞【躄仆 phih-phak】、【躄仆虎 phih-phak-hóo】。
010.【躄仆爬 phih-phak-pê】：我造个新詞，就是軍隊用語〔匍匐前進〕。
請教 覆 佮 仆 按怎分 ?
其實相通。教典是規sian儂phak落去才寫做「仆」。
其實相通。教典是規sian儂phak落去才寫做「仆」。
#台語三字詞 011-014
【虎撐頷 hóo-thìnn-ām】：華語〔托腮、托著下巴〕。也講【虎撐獅 hóo-thìnn-sai】。俗語：「有，做一站；無，做虎撐頷」。
【猴抱棗 kâu| phō-tsó】：形容坐个時，雙跤勼起來胸前，用雙手mooh咧个姿勢。
【牛扑馬 gû-phah-bé】：形容真gâu毀，物件用無偌久就歹去。
【猴咬猴 kâu| kā kâu】：兩个姦夫咧冤家相扑。俗語：猴咬猴，咬甲血哪流。
#台語三字詞 015-017
【仙拚仙 sian-piànn-sian】
高手拚高手。俗語：「仙拚仙，拚死猴齊天。」
【賊劫賊 tsha̍t-kiap-tsha̍t】
烏食烏个意思。俗語：賊劫賊，鰇魚劫墨賊。
【鬼扛鬼 kuí| kng kuí】
爾虞我詐[ní| gû| ngóo| tsà]。孽詰話：閻羅王嫁查某囝－－鬼扛鬼。
#台語三字詞 018-024 並列結構詞
018【福祿壽 hok-lo̍k-siū】
019【財子壽 tsâi-tsú-siū】
020【丁財貴 ting-tsâi-kuì】
也講做【財丁貴 tsâi| ting| kuì】。例句：「丁財貴，三字全[sann-jī-tsn̂g]。」
021【富標通 hù| piau| thong】
財富、標致、通達。這也是選翁[ang]个理想目標。比較中国現代流行話講〔高富帥〕。
講著以上三字詞，攏會使加講「三字全」（sann-jī-tsn̂g），意思是三項攏具足，真好命，不止通予儂欣羨。
-----好歹命分隔線-----
022【枵寒餓 iau-kuânn-gō】
飢寒交迫。「枵」是 hungry，「餓」是 starve，「餓」比「枵」較嚴重。
023【孤貧夭 koo-pîn-iáu】
人生三大不幸，孤單無親、貧窮散赤、夭壽早死。（注意「夭」字本調第二聲，毋是第一聲，佮「妖」無仝音。）
以前个儂，若欲學法術，師傅會要求伊「孤貧夭，著領一字（tio̍h niá tsi̍t-jī）」，叫伊咒誓講將來願意承受人生一項大不幸，按呢師傅才肯教伊法術，予伊得著超能力。
俗語講：「有法有破」（iú-huat| iú-phò），就有儂用偷食步，佇家己个衫仔裾，儂看袂著个所在，鉸破一空，穿即種「破衫」來表示伊已經有承領「貧」个不幸矣。
024【窮死走 kîng| sí| tsáu】
窮散[kîng-sàn]（破產）、死亡、走路（逃走）。事業失敗，上嚴重个下場往往是按呢。
台日典例句：「汝著除起窮死走才來講，若無，的確欲揣汝討！」債主來討siàu，欠主講無錢通還，債主就會按呢共欠主放刁。
#台語三字詞 025-028 三字並列結構動詞
025.【𧮙姦撟 tshoh-kàn-kiāu】：
也講【tshoh-kàn-suān】、【kàn-tōng-suān】，歹喙罵儂，主要內容是威脅欲性侵對方佮對方家屬。
026.【咒控詈 tsiù-khàng-lé/lué】：
也講【咒控詈罵 tsiù-khàng| lé/lué-mē/mā】
歹喙罵儂，主要內容是咒詛[tsiù-tsóo]對方緊死、艱苦死。
027.【扒控搤 pê-khàng-iah】：
(1) 具體个動作，扒塗、用指甲出力挖塗、搤塗，有時是為著揣物件；也指用手佇身軀頂扒癢等，像講：「食飽傷閒，蹛teh扒控搤。」
(2) 揭發隱私。例：「水果記者蓋gâu共儂扒控搤。」
(3) 四界走傱設法。例：「公司錢關袂轉[tńg]，干焦我一个咧扒控搤。」
028.【摸挲捏 bong-so-tīnn】：
做瘦氣[khuì]个一寡動作，〔愛撫〕。
#台語三字詞 029-031
029.【封炕滷 hong-khòng-lóo】：
煮肉个三種料理法，通稱高級肉食。例：「三頓串食封炕滷，按呢身體袂健康啦，儂講食魚食肉，嘛著菜甲。」
030.【挨吹唱 e-tshue-tshiùnn / ue-tshe-tshiùnn】：
通稱演奏各種樂器佮唱曲[khik]，「挨」是挨絃仔類个樂器，「吹」是歕吹奏類个樂器。例：「較gâu个徛館先生，挨吹唱攏會。」
031.【牛犁耙 gû-lê/luê-pē】駛牛、駛犁、駛手耙、駛割耙，通稱作農个各種工夫。注意「耙」字佇遮唸第七聲，毋是第五聲。例：「牛犁耙，逐項會。」
Hut-kong-phah
有人奸貪kah口詐，so͘-sú人oan-ke有cheng-chha，弄人生死hut-kòng phah，to̍h過peh殿虎頭鍘。
呂柳仙--十殿閻君
032.【金香燭 kim-hiunn-tsik】：
金紙、香、蠟燭，拜拜个時，時常用來燒个三種供品，也是通稱。
033. 【龜粿粽 ku-kué/ké-tsàng】：
三種傳統个民俗食品，也是通稱。
俗話笑談：「毛呼龜粿粽，紅包據汝送。」（Môo-honn ku-kué-tsàng, âng-pau kù lí sàng.）
恥笑司公誦經無虔誠，干焦咧siàu想儂个紅包，煞烏白唸。
034.【薰茶炭 hun-tê-thuànn】：
殷勤招待儂客个三種好物，也是通稱。
例句：為迄个市長盡心付出，結果欲走个時煞予伊剾洗講無利可圖啦，棄職潛逃[khì-tsit tsiâm-tô]啦，真正是薰茶炭換鼻痰瀾[phīnn-thâm-nuā]，了然。
036.【痠軟疼 sng-nńg-thiànn】
037.【滾絞疼 kún-ká-thiànn】
038.【大心氣 tuā-sim-khuì】：
(1) 華語〔呼吸急促〕。
(2) 趕狂。
039.【倒啜氣 tò-tsheh-khuì】：
雄雄喘氣袂順（請先進補充說明）
040.【倒吞氣 tò-thun-khuì】：
歕樂器个循環換氣法，會使保持樂音袂斷去。
#台語三字詞 041-046
041.【爽假疼 sóng| ké thiànn】：
事實感覺真爽，但是假做真疼、無愛个形，有性暗示。名喙咧批評政客，有時也會用著。
042.【爽袂退 sóng bē/buē thè】：
一直持續爽快、亢奮个狀態，超過身體負擔會起个程度。
043.【氣暢忍 khì-thiòng-lún】：
實在會予儂足氣，但礙[tān-gāi]佮對方有某種關係，所以歹勢發作。有時也指華語〔又好氣又好笑〕个意思。
044.【樂暢班 lo̍k-thiòng-pan】：
愛嘩[huā]、愛耍、愛花天酒地个儂抑是一陣儂。
045.【暢舍囝 thiòng-sià-kiánn】：
花花公子。
046.【m̄-liòng-thìn】：
心情無爽快，面色歹看。
#台語三字詞 047
047.【討契兄 thó-khè/khuè-hiann】：
華語〔偷漢子〕，婦女佮查埔發生無正當个男女關係。
「情夫」个意思，閩、台語叫做「契兄」，歷史已經真久，但是社會上真濟儂个語感是「客兄」。到底著寫「契」抑是「客」咧？（目前教台典寫「契兄」、「討契兄」）
先講結論，這無唯一正確答案，兩種攏有。
若是偏漳腔个儂，「契」唸 khè，「客」唸 kheh，本調無仝，但是即兩字若出現佇變調位置，就分袂出來矣，所以無論寫做「契兄」抑是「客兄」，怹唸起來攏仝音，分無路來。
總是，即兩種寫法，對泉腔儂來講，唸法就無仝，寫「契兄」，就愛唸做 khuè-hiann（老安溪腔唸 kherè-hiann），若寫「客兄」，就愛唸做 kheh-hiann。
按呢泉腔个儂，到底是講佗一種咧？問題就出佇遮－－無的確！有个所在个泉腔儂講 khuè-hiann，有个所在个泉腔儂講 kheh-hiann（包括金門），即个意思泉腔有兩種講法个現象毋是戰後才有，也毋是台灣才按呢。
我初步个判斷是：泉腔大概較多數是講「契兄 khuè/kherè-hiann」，但是也有袂少泉腔儂是講做「客兄 kheh-hiann」。
「契兄」本義是指「結拜兄、義兄」，予儂借用來婉轉指稱情夫，後來只賰借用義咧通行，所以若欲講義兄，逐家無愛閣講是「契兄」，就講「結拜兄、換帖--个、義兄」等。不過，其他个結拜關係就閣有講「契」字，像「契爸 khè/khuè-pē、契母 khè-bó / khuè-bú、契囝 khè/khuè-kiánn、契查某囝 khè/khuè-tsa-bóo-kiánn」，尤其是「予神明做契囝」个代誌目前猶原真捷聽著、講著。
若是「客兄」字面上只會使解說做是妓女（抑是無正經个查某）个「儂客兄」个意思，用做情夫个婉稱。「儂客兄」是正常、好禮个通稱，但是簡稱「客兄」就干焦指「情夫、姦夫」。
講「客兄 kheh-hiann」个泉腔儂雖然有可能是誤解語源所致，但是既然怹喙裡講 kheh-hiann，心裡上也認定是「客兄」，咱就愛客觀記錄。
台日典「契兄」、「客兄」攏有收，「契兄」有標兩音 khuè-hiann 佮 khè-hiann，「客兄」就標一音 kheh-hiann，但是釋義攏仝款。我認為就是照我頂面所說明--个來記錄个關係。
無論是「契兄」抑是「客兄」，用來指稱「情夫」，本來攏是婉轉个講法，總是，用久了後，逐家語感上就認定是足歹聽个話啦！
動詞「討」有兩重含意，一重是「有求於人」，一重是「態度迫切」，像「討趁」、「討食」、「討錢」、「討命」。
佇咧禮教食儂个古早時代，要求婦女著愛遵守三從四德，一个查某儂若是發生婚外情，就會予儂笑罵，講伊穩當是真hah，才會不安於室，去咧「討契兄」，也就是態度真迫切去求「契兄」來滿足伊个性慾。
請注意，這佮「客家(Hakka)」个「客」無關係，客家朋友毋通誤會，煞認為受著侮辱。
補充：
「討」有兩重含意，一重是「有求於人」，一重是「態度迫切」，像「討趁」、「討食」、「討錢」、「討命」。
佇咧禮教食儂个古早時代，要求婦女著愛遵守三從四德，一个查某儂若是發生婚外情，就會予儂笑罵，講伊穩當是真hah，才會不安於室，去咧「討契兄」，也就是態度真迫切去求「契兄」來滿足伊个性慾。
『「契爸 khè/khuè-pē、契母 khè-bó / khuè-bú、契囝 khè/khuè-kiánn、契查某囝 khè/khuè-tsa-bóo-kiánn」，尤其是「予神明做契囝」个代誌目前猶原真捷聽著、講著。』+1。Che chiok 心適ê ōe，阮細漢lóng ū lih kóng。
M̄-kó，nā 是 結拜姊妹，kám ū-lâng kóng khè-chí a̍h sī khè-mōe?
台日典有收「契小弟、契小妹、契妹」但是無看著「契姊」。
台日典有收「契小弟、契小妹、契妹」但是無看著「契姊」。
#台語三字詞 048
048.【鬥伙計 tàu-hué/hé-kì】：
查某儂「討契兄」，查埔儂「鬥伙計」。「鬥伙計」是「討契兄」个相對詞，「鬥伙計」就是查埔去佮查某發生無正當个男女關係。
本來閩、台語「伙計」（注意「計」字唸白話音 kì，毋是 kè）是指合股做生理个對象，華語〔合夥人〕；抑是指店員。後來予儂提來婉稱情婦，用久了後，正常意思煞失落去。「鬥伙計」本來是指「佮儂股株[kóo-tu]」，後來講著「鬥伙計」，逐家干焦會想著「查埔儂佇外口飼查某」迄種意思。
#台語三字詞 049
049.【賣大燈 bē/buē-tuā-ting】：
指查埔予儂招[tsio]，華語【入贅】。
「大燈」是指「字姓燈」，古早時代，正常情形是查埔娶新娘入來；姑不將个時，查埔才會出去予女方招，生出來个囝就綴老母姓，等一[tíng-it]是放棄傳宗接代个責任，袂輸是將「字姓燈」賣儂咧，所以才用「賣大燈」來比並。「燈」佮「丁」仝音，「丁」就是「查埔囝」，「大燈」可能也指hông招个查埔儂本身。
關係結婚用个「字姓燈」，臺灣民俗文物辭典網站有寫：
------
『新婚迎娶時，男方要準備一對寫有男女雙方的堂號姓氏的「字姓燈」或「子婿燈」的燈籠，古代是吊掛在二人扛的叔爺轎上，四周圍有白紗布，布上寫著「鳳毛麟趾」、「麟趾呈祥」等吉利字句。叔爺轎不一定是坐新郎的弟弟，同輩親戚的弟弟也可以。
字姓燈沿途可讓人瞭解是那戶娶親，迎娶回男方家後，再懸掛在神明廳的樑上，因「燈」閩南諧音同「丁」，有象徵一對新人將可在神明與祖先的庇佑下，早日「出丁」，生出健壯的男丁，來傳承香火命脈，所以有的又稱「子孫燈」。若新郎的父母早年有向神明許願者，結婚的前一天晚上子時（半夜十一點到翌日凌晨一點），便要事先在男家舉行結婚謝天公的儀式，而字姓燈便也需先送到新房敬拜過後，再拿到神明廳懸掛。』
#台語三字詞 050-052
050.【綴轎後 tuè-kiō-āu】：
有囡仔个婦人儂，改嫁个時，囡仔綴咧過去予後叔[āu-tsik]（繼父）做囝，即種做法叫做「綴轎後」。「綴轎後--个」華語講〔拖油瓶〕，是指迄个囡仔本身。
051.【順孝娶 sūn-hà-tshuā】：
也講【就孝娶 tsiū-hà-tshuā】，注意「孝」是唸白話音 hà，毋是 hàu。
序大儂過身，照古禮序細袂使隨結婚，著等三年過，但是咱民間容允「順孝娶」个特例，就是佇序大儂出山迄工，就去迎親轉來予新娘佮翁婿做伙共序大儂送上山頭。閣一種是佇百日內娶親，也會用得。
052.【姑換嫂 koo-uānn-só】：
兩个家庭互相嫁娶，阮查某囝嫁恁後生，恁查某囝嫁阮後生。按呢就變做即兩个新娘，互相是對方个兄嫂兼小姑，關係真複雜。
古早儂無佮意按呢做，可能是累積个經驗，發現即種關係个婚姻，時常袂幸福，兩个婦人儂容易比較彼此个處境來窮分、抾怨。俗語講：「姑換嫂，無thang好。」
總--是，兩家儂若真和睦有量，按呢「姑換嫂」就有可能愈幸福。
#台語三字詞 053-058 時辰
053.【雞報寅 ke/kue-pò-în】：
雞啼，三點至五點个寅時。
054.【天光卯 thinn-kng-báu】：
天光，五點至七點个卯時。
055.【日出辰 ji̍t-tshut-sîn】：
也叫做【日上辰 ji̍t-tsiūnn-sîn】。日頭已經出來，七點至九點个辰時。
056.【日落申 ji̍t-lo̍h-sin】：
日頭欲落山，下晡三點至五點个申時。
「辰 sîn」佮「申 sin」兩字本調無仝，但是漳腔若講「辰時」佮「申時」，按呢前字變調了後，兩个時辰就聽袂出差別矣，若頭前加上「日出」、「日落」就分會出到底是日出个辰時，抑是日落个申時。
057.【大肚申 tuā-tōo-sin】：
"sin" 即个音，台語有幾若个仝音常用字，像「新、辛、申、身、娠」，講著「申」字時，為著分別，除了會使得講：「日落申个申」，也會使得講「大肚申」，這是因為漢字「申」看起來中央大大，像大腹肚，這請毋通掠準是大腹肚「有身」个「身」。
058.【點燈酉 tiám-ting-iú】：
也講【點燈火酉 tiám-ting-hué/hé-iú】。暗時五點至七點个時間。
#台語三字詞 059-076
059.【洗目睭 sé/sué-ba̍k-tsiu】：
除了正常个字面意思以外，也有儂用來指：看色情表演。
例：「往過阮迄个堂--个，定定愛去南勢角个戲園『洗目睭』。」
060.【使目尾 sái-ba̍k-bué/bé】：
(1) 華語〔使眼色〕，用來暗示提醒啥乜代誌，抑是表達不滿、受氣、驕傲等。
(2) 華語〔送秋波、拋媚眼〕，也有講【射目箭 siā-ba̍k-tsìnn】。傳統戲劇个戲旦佇台頂會【落詼 lo̍h-khue/khe/kher】來佮觀眾互動，觀眾就會【承詼 sîn-khue/khe/kher】。
即个詞，會使配用个動詞有幾若个，除了 "sái" 以外，閣有【捽 sut】、【拖 thua】、【牽 khan】、【勾 kau】等。
例：佳哉有伊共汝使目尾，無，汝就piak-piak出來矣（祕密攏講出來）。
061.【貫牛鼻 kǹg-gû-phīnn】：
受著別儂管制束縛，袂閣隨意行動。
例：某儂少年時代歹囝浪蕩[pháinn-kiánn-lōng-tōng]，結婚了後，煞袂輸予儂貫牛鼻咧，逐工起早坐晏，歸心顧店趁錢飼某囝。
062.【搧大耳 siàn-tuā-hīnn】：
利用儂个無知來欺騙伊、佔伊便宜。
063.【剃喙鬚 thì-tshuì-tshiu】：
除了正常个字面意思以外，也有用來比喻「當面羞辱」个意思，佮「洗面」類似情形。
例1：「本來欲共伊洗面，煞顛倒予伊剃喙鬚。」
例2：「相命先共伊講：『三工內囡仔就揣會轉來，到時若無影，做汝來共我剃喙鬚！』」
064.【掣虎鬚 tshuah-hóo-tshiu】：
華語〔老虎嘴上拔毛〕。
例：新來个總經理特助，狗傍虎威[káu| pn̄g hóo-ui]，囂俳-ueh-ueh。規公司干焦會計小姐一个儂敢共伊掣虎鬚。
065.【擢舌根 tioh-tsi̍h-kin/kun】：
(1) 講話大舌。
(2) 傳說，若害死儂，冤鬼會來共凶手擢舌根，予伊招認罪狀。
066.【擠猴胿 tsik-kâu-kui】：
強討財物。
例：「敢共地下錢莊借錢，連鞭汝就hông擠猴胿。」
067.【頓胸坎 tǹg-hing-khám】：
華語〔拍胸脯〕。
例：「儂伊有頓胸坎、掛保證咧！」
068.【塞後手 siap-āu-tshiú】：
oo-se、布賂[pòo-lōo]个意思。
也講【楔後手 seh/sueh-āu-tshiú】、【下後手 hē-āu-tshiú】。
例：「慶富若無共[kā]官員塞後手，有通遮好食穿？」
069.【贈後手 tsān-āu-tshiú】：
助一臂[pì]之力。
也講【贈後 tsān-āu】、【贈後跤 tsān-āu-kha】（細膩，毋通講做 tsām-āu-kha）、【贈後注 tsān-āu-tù】、【赴後手 hù-āu-tshiú】。
例：我通共汝贈後手，總--是，著汝家己有心肯做，代誌才會成[tsiânn]。
070.【拭尻川】：
(1) 照字面解說。
例：「共嬰仔拭尻川。」
(2) 善後，替儂處理麻煩代誌。
例：「生甲汝即个了尾仔囝，見擺佇外口出代誌，攏著恁爸去共恁拭尻川。」
071.【嬈尻川 hiâu-kha-tshng】：
家婆，無事揣事。
例：「嬈尻川去共伊托透[thok-thàu]，伊聽了掠狂--到塊，去揣對方理論个時，破柴連柴砧煞破，講是我講个！」
072.【擽尻川 ngiau-kha-tshng】：
唆使、弄慫[lōng-sóng]、慫恿[sóng-ióng]。
例：無儂共伊擽尻川，伊也袂食飽傷閒，去承[sîn]即个屎缺。
073.【扶𡳞脬 phôo-lān-pha】：
奉承巴結，這是粗魯个講法。較雅氣著講【扶挺 phôo-thánn】、【扶扶挺挺 phôo-phôo-thánn-thánn】。
074.【扶後跤 phôo-āu-kha】：
華語〔扯後腿〕。
例：翁死閣拄著歹ta-ke！若毋是伊共我扶後跤，今我嘛袂遮狼狽[liông-puē]。
075.【揬骨縫 tu̍h-kut-phāng】：
華語〔挑毛病、揭瘡疤、見縫插針〕。
例：「汝个評論著寫予較客氣婉轉咧，毋通予儂感覺汝是咧共伊揬骨縫。」
076.【反七寸 píng-tshit-tshùn】：
自暴其短、家醜外揚。「七寸」是蛇个要害，上脆弱个部份。
例：厝內个代誌，曷通[a̍h thang]反七寸予儂看！
#台語三字詞 077-092 動詞+喙+○
077.【流喙瀾 lâu-tshuì-nuā】：
垂涎[suî-siân]貪慕，對象包含食、穿、用各方面攏有可能。若是講【流豬哥瀾 lâu ti-ko-nuā】就是表現出好色个形。
078.【吵喙齒 tshá-tshuì-khí】：
華語〔抬槓〕。為著無聊个小事咧吵喙。
079.【插喙筅 tshap-tshuì-tshíng】：
罵儂家婆插喙咧干涉、出主意。
080.【夾喙牙 kiap-tshuì-gê】：
喋[thi̍h]袂煞。
081.【扑喙鼓 phah-tshuì-kóo】：
華語〔閒扯淡〕。
082.【答喙鼓 tap-tshuì-kóo】：
(1) 華語〔閒扯、拌嘴〕。
(2) 類似〔相聲〕个一種雙儂講台語个娛樂表演。
俗語：練仙答喙鼓。
083.【使喙水 sái-tshuì-suí】：
kōo喙講好聽話，但是口惠不實[khió-huī put-si̍t]。
例：伊來搝保險个時，盡gâu使喙水，正經拄著代誌欲揣伊出險，伊就龜龜-sui-sui。
084.【使喙花 sái-tshuì-hue】：
華語〔耍嘴皮〕。
085.【使喙撮 sái-tshuì-tshok】：
頤指氣使[î tsí khì sú]。「喙撮」就是喙唇㧣[tu]出來个形，「使喙撮」就是喙唇連鞭㧣即爿，連鞭㧣迄爿，來咧指揮儂做代誌，家己煞攏毋肯振動。
俗語：豬哥使喙撮。
086.【斂喙頭 liám-tshuì-thâu】：
控制食慾，毋敢食濟。這佮【噤喙 khiūnn-tshuì】無啥仝，"khiūnn" 是為著健康因素來限制飲食，斂喙頭無一定。
087.【破喙鏨 phuà-tshuì-tsām】：
出喙阻止。出喙个儂無一定是好意抑歹意。也有講【破鏨 phuà-tsām】。
例：當年我欲去中國投資，佳哉伊來共我破喙鏨，我才袂了甲褪褲轉來。
088.【盤喙錦 puânn-tshuì-gím】：
(1) 兩个儂一句來、一句去，講講一寡五四三个閒話。練仙答喙鼓。也叫做【盤喙花 puânn-tshuì-hue】。
(2) 華語〔繞口令〕。
例：傳統布袋戲有一段出名个盤喙錦：和尚和尚挵破鼓，提褲來補鼓，鼓|破|褲|補，褲|破|布|補，毋知是布|補鼓，抑是褲|補鼓。
089.【呸喙瀾 phuì-tshuì-nuā】：
唾棄。較強个口氣講【呸痰呸瀾 phuì-thâm-phuì-nuā】
例：「連鞭走去佮抓耙仔頭握手相幔，連鞭走去記念民主烈士，即種無格个政客，我欲共伊呸喙瀾。」
090.【紲喙尾 suà-tshuì-bué/bé】：
食啥乜了後，紲落去閣食別項，有時是因為食無夠khuì，有時是欲予喙尾个感覺較好。
例：苦-teh-teh个煎漢藥啉落去了後，緊食一塊糖仔紲喙尾--tsè。
091.【綴喙尾 tuè-tshuì-bué / tè-tshuì-bé】：
(1) 重覆儂講過个話尾。
(2) 模仿儂講話，無新意。拾人牙慧[si̍p-jîn gâ-huī]。也有講「承[sîn]儂話屎」、「抾儂个喙尾 / 話粕[phoh] / 話屎 / 糟粕[tsau-phoh]」、「食著儂个喙瀾」等。
這佮【順話尾 sūn-uē-bué/bé】無仝，順話尾真gâu，會曉掠儂个話意，來接話講予伊愛聽。
092.【窒喙空 that-tshuì-khang】：
(1) 食物件來滿足口腹之慾。
(2) 設法阻擋儂个喙，予伊mài將啥乜機密个代誌講出來。
#台語三字詞 093-103 並列結構詞
093.【鼻目喙 phīnn-ba̍k-tshuì】：
五官、生做（名詞）。也講【喙目鼻 tshuì-ba̍k-phīnn】。
094.【雞鴨鵝 ke-ah-gô】：
家禽[ka-khîm]。
這我新造个。舊詞講「雞鴨」「雞鴨仔」「雞仔鴨仔」、「雞仔鳥仔」。
095.【豬牛羊 ti-gû-iûnn】：
家畜[ka-thiok]，有直接个生產利益，也當做「大三牲」祭品。四字詞是【豬狗牛羊 ti-káu| gû-iûnn】，即四種就是台灣農村上普遍看會著个家畜。
「豬牛羊」、「豬狗牛羊」即兩个詞攏我新造个。舊詞講：【精牲 tsing-senn/sinn】，也講「豬狗精牲」，但是精牲包含家畜、家禽，而且時常用來做罵儂个話。舊詞閣有【畜生 thik-senn/sinn】完全當做罵語用。
096.【豬狗牛 ti-káu-gû】：
罵儂个行為無像儂，像精牲。俗語：「驚某大丈夫，扑某豬狗牛。」
097.【碗碟箸 uánn-ti̍h-tī】：
餐具。台日典有收，咱現代儂可能會感覺【碗箸匙 uánn-tī-sî】較合用，總是，舊底無按呢講个款。兩字舊詞是「碗箸」。
098.【鍋坩鼎 ue/e-khann-tiánn】：
炊具，這是我新造个。舊詞講「鍋仔坩仔 ue/e-á-khann-á」。
099.【花草樹 hue-tsháu-tshiū】：
植物[si̍t-bu̍t]。
這我新造个，四字詞就講【花草樹木 hue-tsháu| tshiū-ba̍k】。
若是動物，舊詞有講【飛禽走獸 pue/pe-khîm| tsáu-siù】，但是按呢範圍無夠，咱會使新造四字詞【禽獸蟲豸 khîm-siù thâng-thuā】。當然，欲講「植物」、「動物」攏無要緊，只是即種講法有科學感，但是較無文學感。
100.【鹹酸甜 kiâm-sng-tinn】：
書面語是【蜜餞 bi̍t-tsiàn】，台日典也有收。
用三个形容詞字眼來表示即種喙食物[tshuì-tsia̍h-mi̍h]，真有修辭美。
台日典閣有收【蜜餞糖粿 bi̍t-tsiàn thn̂g-kué/ké】，就是拜拜所用个點心類。
101.【酸甘甜 sng-kam-tinn】：
形容詞，形容酸酸、甘甘、甜甜个滋味。查某囡仔真愛。也時常講重覆形「酸甘甜仔酸甘甜」來加強語氣。
102.【斗秤尺 táu-tshìn-tshioh】：
也講【尺斗秤 tshioh-táu-tshìn】。「斗」指容量，「秤」指重量，「尺」指「長度」，合起來就是【度量衡 tōo-liōng-hîng】个意思（「度」是長度標準，「量」是容量標準，「衡」是重量標準）。
103.【筆墨硯 pit-ba̍k-hīnn】：
寫毛筆字个家私。
#台語三字詞 104-108 歹囝个行為
104.【食跋𨑨 tsia̍h-pua̍h-thit】：
食烏薰（鴉片 a-phiàn）、跋筊、𨑨迌（尤其是指嫖婊[phiâu-piáu]）。也講【跋食𨑨 pua̍h-tsia̍h-thit】。注意「𨑨」字著採用泉腔个講法 thit，毋是漳腔 tshit，因為漳腔無用單字 tshit，泉腔才有用單字 thit。動詞 "thit" 無完全用佇做歹，也有用佇【𨑨絃管 thit-hiân-kuán】（【絃管 hiân-kuán】指【南管 lâm-kuán】音樂）。
例句：食跋𨑨，三字全[tsn̂g]。
105.【嫖賭飲 phiâu-tóo-ím】：
嫖婊、跋筊、啉酒。
106.【拂摃扑 hut-kòng-phah】：
冤家相扑。三字攏動詞。
以上个行為，合起來有四字詞：【開跋食𨑨 khai-pua̍h| tsia̍h-thit】、【啉斟摃扑 lim-thîn| kòng-phah】。
107.【佬騙設 láu-phiàn-siat】：
也講【佬騙術 láu-phiàn-su̍t】，三字攏是動詞，攏有詐騙个意思。詳細按怎分，請先進賜教。我暫時先按呢解說：「佬」是假內行來詐騙儂；「騙」是通稱詞，講假話予儂相信是真；「設、術」就是設局詐欺儂，來騙取儂个錢財佮無正當个利益。
----附記看起來像做歹，其實毋是个三字詞----
108.【刣扑剉 thâi-phah-tshò】：
(1) 拚命爭取。
(2) 展覽會、商展場等等，辦予足熱烈、奢颺[tshia-iānn]。
#台語三字詞 109-110 予儂棄嫌个䆀種
109.【綠豆鬼 li̍k-tāu-kuí】：
濫佇正常个綠豆仔內底，sian煮都煮袂爛，真𠕇[tīng]、歹食个豆仔。
綠豆浸好（有儂無先浸），欲煮進前，攑菜刀佇豆仔頂面畫十[si̍p]字，做聖[tsò-siànn]一下，叫做「刣綠豆鬼」，聽講按呢煮起來个綠豆湯就袂有綠豆鬼，閣好食。
毋知刣綠豆鬼个時，愛唸啥乜咒語無？請知影个先進賜教。
110.【倒吊子 tò-tiàu-tsí】：
佮正常菁仔生長方向倒反个䆀菁仔（檳榔子[tsí]），一欉檳榔樹頂，會生幾粒仔即種倒吊子，挽菁仔个時，著愛將倒吊子挽㧒捔[hiat-ka̍k]，毋通賣儂食。倒吊子个植物鹼[si̍t-bu̍t-kinn]是正常菁仔个兩倍以上，食落去，儂會足艱苦，嚴重會無命。
---
應該閣有其他即類个三字詞，拜託各位鬥提供，感謝
#台語三字詞 111-118 猴毋是猴
台語用猴來譬相[phì-siùnn]--儂，通常是咧罵查埔--个。
111.【毋成猴 m̄-tsiânn-kâu】：
(1) 罵儂生瘦歹看，閣行為不端。
(2) 用來呵咾親近个儂真gâu个時，也會刁工按呢講。
112.【矮仔猴 é-á-kâu】：
罵儂生做矮閣歹看。
113.【死老猴 sí-lāu-kâu】：
查某儂罵怹翁毋是款。抑是一般咧罵無品个老查埔。
114.【金絲猴 kim-si-kâu】：
本義是一種金毛个猴仔。也用來指有錢个嫖客、情夫。
115.【猴囡仔 kâu-gín-á】：
形容活骨、狡怪个囡仔。
116.【紅目猴 âng-ba̍k-kâu】：
(1) 魚名，華語〔台灣小䰾〕。也叫做【紅目鮘 âng-ba̍k-tāi】、【牛屎鯽仔 gû-sái-tsit-á】。（其中一種〔史尼氏小䰾〕，南投叫做【四點金仔 sì-tiám-kim-á】。）
(2) 罵有紅目睭病个儂，抑是譬相gâu怨妒个儂，因為「怨妒」个意思台語有講【目孔赤 ba̍k-kháng-tshiah】。
117.【灌杜猴 kuàn-tōo-kâu】：
(1) 灌水入去杜猴（蟋蟀）个空內，逼伊出來，庄跤囡仔定定做个作孽代。
(2) 形容儂 使直喉[sái-ti̍t-âu] 咧灌酒、啉飲料。
例：「阿元熱--儂上愛啉bih-luh，下班轉來，規罐栽落去，哪teh灌杜猴咧。」
(3) 警察共儂灌水折磨个一種酷刑。
例：「較早警察真歹死，刑--人會用灌杜猴，予汝腹肚漲甲欲破去，生不如死喔！」
118.【內山猴 lāi-suann-kâu】：
恥笑毋捌看過世面个儂。
#台語三字詞 119-120 好事來，歹事煞
119.【做譴損 tsò/tsuè-khiàn-sńg】：
做一寡儀式性个言語、動作來祈求逢凶化吉、趨吉避凶[tshu-kiat pī-hiong]。
簡單个例，像有儂目睭皮一直掣，傳說這是歹吉兆，伊就唸講：「目睭皮咇咇掣，好事來，歹事煞。」也有儂會哪捻目睭皮，喙哪講：「目睭皮咇咇掣，毋是刣，就是割」。
無細膩摃破碗，傳說這可能是歹吉兆，華語儂就會唸講：〔歲歲平安〕，因為華語〔歲歲〕佮〔碎碎〕仝音，怹按呢講來祈求轉禍為福。台語也有講：「挵破瓷[huî]，金銀一大堆。」（台語儂是毋是較愛錢啊？）
欲去共儂【覓喪 bāi-song】（弔喪）、探病、培墓進前，先挽三片抑是七片完整个榕仔葉，紮佇身軀頂，結束轉來佇半路个時，著將榕仔葉擲㧒捔，用按呢來辟邪[phik-siâ]，這也是「做譴損」。（佮喪事有關个譴損，上蓋濟。）
即種代誌，因為無科學根據，所以難免有迷信色彩，但是民俗袂使得用科學來否定伊个社會價值。
民間也有家己調整个機制，有个儂傷濟禁忌[kìm-khī]，別儂也會講伊【厚譴損 kāu-khiàn-sńg】（厚迷信），勸伊毋通傷過【見古 kiàn-kóo】（堅持古早例）。
120.【做竅妙 tsò/tsuè-khiàu-biāu】：
「妙」字唸古早音 biāu，毋是 miāu。「做竅妙」佮「做譴損」攏是祈求好運，洪惟仁老師《臺灣禮俗語典》p.267 寫講：
---
臺灣的咒術有兩類，三種。
一類是吉咒，目的是祈願將來吉祥，自己為自己做的叫【做譴爽 tsò-khiàn-sńg】，為他人做的叫【做竅妙 tsò-khiàu-biāu】；一類是凶咒，祈望帶來災禍，謂之【做竅 tsò-khiò】。凶咒當然是為他人做，不會為自己做，所以只有三種。
比如抱養一隻小狗，第一天便帶它到野外，用一張紙在它屁股擦擦，口中唸唸有詞，祈望這隻狗將來不會在家裡隨便拉屎，這就是【做譴爽】。
又如木工造屋時，弄個小船放在屋頂，如船頭向外，表示【大船載出 tuā-tsûn tsài-tshut】以為這個家就會傾家蕩產，這叫【做竅】；假如船頭向內，表示【大船載入 tuā-tsûn tsài-ji̍p】，以為這個家庭將來就會家運興隆，這叫【做竅妙 tsò-khiàu-biāu】。
---
khiàn-sńg 个漢字無定論，教典用字是「譴損」，但是洪老師寫做「譴爽」可能較正確，因為漳音「損」白話音是唸 suínn，但是 khiàn-sńg 即个詞怹也是講 khiàn-sńg，毋是 khiàn-suínn。
若寫做「爽」字，無論漳泉，白話音攏是 sńg。「譴」是用話來責除，「爽」是「失」个意思，也就是指歹代誌，所以「譴爽」有符合「用言語、動作个一寡儀式來排除不幸、災厄」个概念。
另外一个類義詞叫做【做聖 tsò/tsuè-siànn】（「聖」字唸白話音），就是做一寡象徵性个動作來祈福、向望好結果。
像我頂篇寫个「刣綠豆鬼」，只是用菜刀比咧比咧，毋是真正咧「刣」，這也算是「做聖」。
嬰仔出世四個月，【做四月日 tsò-sì-gue̍h-ji̍t】个儀式，有一項【收瀾 siu-nuā】，這也是咧「做聖」。共囡仔「收瀾」目前閣定定看會著，所以佇遮無詳細講。
排撥 可能是唸做 pai2-puah, 台日典有收，伊漢字寫 擺撥，台日典無收 pai5-puah
#台語三字詞 121-146 用動物來比喻一个儂（猴免講，頂擺有寫過矣）
121.【三跤貓 sann-kha-niau】：
比喻能力䆀、憨慢个儂。
俗語：「三跤貓欲笑一目狗[it-bo̍k-káu]」。
122.【垃圾貓 lah-sap-niau】：
比喻放蕩好色个查埔儂。
俗語：「垃圾貓咬錢鼠」（lah-sap-niau kā tsînn-tshí），男女苟合个意思。
123.【青盲牛 tshenn-mê-gû / tshinn-mî-gû】：
比喻文盲。
124.【烏喙牛 oo-tshuì-gû】：
比喻定定講歹喙个儂。
125.【台灣牛 Tâi-uân-gû】：
比喻任勞任怨个儂。
俗語：「澎湖查某台灣牛」。澎湖查某儂个辛苦，通佮台灣牛來比並。
126.【大官虎 tuā-kuann-hóo】：
比喻作威作福个大官。
127.【生面虎 tshenn/tshinn-bīn-hóo】：
比喻容易使性地个儂。
128.【笑面虎 tshiò-bīn-hóo】：
佮華語〔笑面虎〕仝款比喻用法。
129.【子弟虎 tsú-tē-hóo】：
利用、倚靠阿舍囝（紈褲子弟）咧開跋食𨑨个儂。
130.【虎豹母 hóo-pà-bú/bó】：
形容刺耙耙个查某儂。華語〔母老虎〕。
131.【台北彪 Tâi-pak-piu】：
台北个煙花女，簡稱【北彪 pak-piu】。
132.【穿山龍 tshng-suann-lîng】：
比喻風水先。
俗語：「穿山龍，萬世窮[bān-sì kîng]」。
133.【雙頭蛇 siang-thâu-tsuâ】：
華語〔雙面人、騎牆派〕，也指使弄雙爿不和个儂。也講【雙面刀鬼 siang-bīn-to-kuí】。
134.【落屎馬 làu-sái-bé】：
比喻無能个儂。也叫做【跛跤馬 pái-kha-bé】。
135.【毋是馬 m̄-sī-bé】：
指輕浮个查某儂。
136.【帶驛馬 tuà-ia̍h-bé】：
帶有淫蕩个性質。
137.【相扑雞 sio-phah-ke / sann-phah-kue】：
比喻愛佮儂冤家相扑、相告个儂。
俗語：「相扑雞，頭無毛。」比喻好[hònn]爭鬥、相告个儂，無論輸贏，兩爿攏有相當个損傷。
附記四字詞【臭頭雞仔 tshàu-thâu-ke/kue-á】：
比喻予眾儂討厭个儂，抑是佇團體中受霸凌个儂。佇遮「臭頭」是指予別隻雞啄甲禿頭，閣流血流滴。
例：伊佇學校做臭頭雞仔。
138.【大格雞 tuā-keh-ke/kue】：
品種上，體形較大、骨骼較大个雞。若是比喻儂个講法，通常用佇以下兩句俗語。
俗語1：「大格雞，慢啼。」相當文言成語【大器晚成 tāi-khì buán sîng】。
俗語2：「無毛雞，假大格」（Bô-moo-ke, ké tuā-keh），教台典解說：〔比喻一個人明明沒有真材實料，卻打腫臉充胖子。〕
139.【揜尾狗 iap-bué/bé-káu】：
教台典解說：〔夾著尾巴的狗，多用來形容落敗而逃或是喪志落魄的人〕。
140.【大相狗 tuā-siùnn-káu】：
「狗」佇十二生相排佇尾二名，照講是「小相 sió-siùnn」但是即个詞顛倒用「大相」來形容狗，這是咧比喻一个面戇神戇神，親像予儂放捒个儂，時常用來責備看著長輩、儂客，袂曉出聲招呼个囡仔序細。
例：「汝看著姑婆來，煞激恬恬，袂曉問--一下，一隻哪大相狗咧！」
「問」是稱呼對方來問候个意思，像講：「姑婆！汝來喔？遮罕行！」通常囡仔儂只要會曉叫一聲長輩个稱呼，像「姑婆！」，按呢就袂予序大儂罵矣。
141.【痟豬哥 siáu-ti-ko】：
癡漢、好色男。好色男个第一名叫做【虎頭豬哥 hóo-thâu-ti-ko】。
142.【豬母顛 ti-bú/bó-tian】：
華語〔花癡〕，也講【桃花痟 thô-hue-siáu】。
143.【戇大豬 gōng-tuā-ti】：
華語〔大笨蛋〕。
144.【犁屎豬 lê/luê-sái-ti】：
用鼻頭犁屎个豬，也用來罵行路無看頭前，一直犁過來个儂。
145.【烏皮豬 oo-phuê/phê-ti】：
比喻癡情个〔粉絲〕。古早是指對某乜戲旦癡迷个查埔觀眾。
146.【踮空龜 tiàm-khang-ku】：
不時勼踮厝內，無愛出門个儂，就是華語流行語講个〔宅男〕、〔宅女〕，也叫做【涵空龜 âm-khang-ku】，意思類似【古井水蛙 kóo-tsénn-tsuí-ke / kóo-tsínn-suí-kue】，但是「踮空龜」往往是家己个意願無愛出門，「古井水蛙」是不得己。
留言
張貼留言