肥皂的台語討論

 

肥皂的台語討論

https://www.facebook.com/khoguan/posts/438835052841195

soap 个台語，有所在叫做「茶箍」，有所在叫做 sap-bûn（變化真濟：suat-bûn / suap-bûn / sòm-muî …）。Sap-bûn 是外來語，語源對歐洲來个，幾若種歐語攏有即个同源詞，像法語是 savon。講「外來語」毋是直接講「外語」，「外來語」有經過咱个語言音韻系統去調整過「外語」个發音，予咱儂毋免受外語教育，嘛攏唸會好勢。

有儂主張「茶箍」才是 soap 个「正台語」，即種觀念有問題：

「茶箍」是咱儂自古就有个天然清潔用品（做茶油个副產品），但是 soap 是外來个新化學產品。用「茶箍」來稱呼 soap，是一種「舊詞新用」个新詞創造法。也就是講，有个閩台語地區是沿用舊詞「茶箍」來稱呼新物 soap，但是有个地區是借用外來語，叫做 sap-bûn。所以攏是一種「借用」，袂用得講「茶箍」才是 soap 个「正閩南語」。

聽講，另外有所在个閩南語將 soap 叫做「番鹹 huan-kinn」，因為「鹹 kinn」自古就有提來做清潔劑，「番鹹」佮「番薯、番麥、番仔火、番薑仔……」遮个詞个造詞法攏仝樣－－看即項外來物佮佗一種在地物卡親像（種類、形體、功用各方面个類似），就用迄種在地物做「詞根」，頭前閣加一个詞頭「番」字來修飾、指明是外來種。

小結論，以上列出咱儂面對新事物个時，創造新詞个三種法度：

一、舊詞新用、

二、外來語、

三、組合舊詞素，來做「解說性」个號名。

值得咱參考來為發展現代台語走揣出路。

https://www.facebook.com/khoguan/posts/441417155916318

紲接「茶箍、sap-bûn」台語號名法个討論：

親像後來閣發明出來个「洗衣粉」，台語欲號名个時，若是將「西洋soap」叫做 sap-bûn 个儂，就共伊叫做「sap-bûn粉」；若是將 soap 叫做「茶箍」个儂，就講是「茶箍粉」，另外也有儂直接將「洗衣粉」个「衣」換做台語口語「衫」，講做「洗衫粉」。

所以重點是：早頭有氣魄个台語儂，啥乜語源不管，攏肯用台語來號、來叫就著啦！（「外語」有經過台語音韻个調整，變做「外來語」，成為台語个一部份），按呢就會凍維持台語个本體性。

無像即馬無氣魄个台灣儂逐家攏甘願直接講華語音，像「捷運」「麥當勞」「宅急便」……

若我，「捷運」就照字唸台語音 tsiat8-ūn（請注意，毋通唸做「節運 tsiat4-ūn」）。〔麥當勞〕我就講外來語 Mai-tá-nòo，計程車司機聽有。日語漢字「宅急便」先父照字唸做 the̍h-kip-piān，我嘛一聽就知。

論到 shower gel，華語叫「沐浴乳」，我常在[tshiâng-tsāi]咧想，對台語來講，有一个足鬥搭个名 thang叫：洗浴乳[sé-i̍k-jú/jí]。

「洗浴」佮「乳」攏是台語本底就有个詞佮詞素－－「洗身軀」台語嘛會用得講「洗浴 sé-i̍k」；若是「乳」，親像鹹鹹好配糜个「豆乳 tāu-jú/lú/jí/lí」就是即个「乳」--字（請注意，「豆乳」毋是「豆奶 tāu-ling/lin/ni」），閣像有一種藥用植物台語叫做「乳香 jú-hiunn」。

用「乳」來共新物[mi̍h]號名，毋是我唱首[tshiòng-siú]个，以前拄仔對外國引進 "papaya" 即種果子个時，就有台語儂觀察著即種植物真𠢕[gâu]流膏膏个白奶，就叫伊「乳瓜 jú/jí-kue」，另外有儂號做「萬壽匏 bān-siū-pû」，可惜後來攏無通行，干焦照漢字書面詞「木瓜」唸台語 bo̍k-kua 卡優勢，但是後來閣變讀白話音 bo̍k-kue。

無，叫做「茶箍精/膏、sap-bûn精/膏、洗浴精/膏、洗身軀精/膏」嘛攏好。

各位對遮个新事物个台語號名，有別種看法，我尊重，也歡喜來參考、綴用，只要咱真正佇生活中使用出來，毋是佇網路頂寫爽个就好。