教典掠包
句型：「……都無／都袂……，哪有通……？」
（華語：「連……都不……，哪能夠／哪有得……？」
俗語例句：「生食都無夠矣，哪有通曝乾？」
（Tshenn-tsia̍h to bô kàu--ah, ná ū thang pha̍k-kuann?）
練習：「飼家己都袂飽矣，哪有通飼某囝？」
請注意，即个所在虛詞是用「都 to」變調變中平調，毋是用「就 tō/tio̍h」變調變低調。
古早台語用較濟「都[to]」，佮「攏」用法無啥仝，現代台灣儂漸漸全部攏講「攏」。若是後半句用「閣有通……」這比「哪有通」个氣口閣較好，其實我也是按呢講，但是看著教育部台語辭典即句俗語寫做「哪會通……」，就照伊个，即陣想起來，感覺後悔。另外，教典有真濟例句句法有問題。
教典【柴頭】有四个義項，第四个 伊寫：
『4.指祖先的牌位。例：拜柴頭 pài tshâ-thâu(祭拜祖先)。』
我相信用「柴頭」來指稱「祖先牌位」是無禮貌个講法。查台日大辭典，伊就有特別註明即種用法是「卑」語，也就是粗魯講法个意思。
咱个囡仔（包括袂少台語老師）對台語已經無啥語感，老師若戇戇仔照教典按呢教：「祭拜祖先嘛會使得講『拜柴頭』」，學生轉去若對長輩講「咱清明咁愛拜柴頭？」，咁袂予大儂修理？
學習語言，掌握「詞色」（也就是語詞个風格、色彩）非常重要，有个詞是正式用語、有个是文言書面語、有个是一般个生活用語、有个是滾笑話、有个是粗魯話/孽siâu話……，一本好辭典，應該清楚註明，才袂害儂用了毋著場合。
我生長个環境較單純，細漢學著台語「放捒 pàng-sat」即个詞（也唸做 pàng-sak），是佇電視台語劇。我个語感，「放捒」个主詞攏是查埔，受詞是查某。這是佇男女無平等个社會結構之下，查某著愛倚靠查埔，所出現个用法。
但是阮朋友講「也有查某儂放翁放囝--个」，這就用單字動詞「放」。當然也有查埔儂「放某放囝」。
社會一直咧變化，女性漸漸較有勢（雖然猶原是弱勢），新个台語流行歌也出現查某放捒查埔个歌詞，像台灣藝術台「阿寶歌聲」節目逐工咧放送个片頭曲「寂寞个黃昏」，雖然是內容是一个查埔咧哭失戀，但是就有唱講：
「心愛--个辜負我、放捒阮，汝是嬈花[hiâu-hue]个儂，親像船過水無痕」。
「嬈花 hiâu-hue」就是「淫蕩」个意思。不過，我看伊歌詞寫做「僥花」，若是按呢，著愛唸做 hiau-hue（泉腔 hiau-hue 佮 hiâu-hue 分會出來），不過我看應該是無 hiau-hue 即个詞。
台語單字「僥 hiau」是無照約束、反背、辜負个意思，用著「僥」个兩字詞有「僥心 hiau-sim」、「反僥 huán-hiau」、「僥反 hiau-uán」、「僥債 hiau-tsè」、「僥吞 hiau-thun」、「僥倖 hiau-hīng」、「僥負 hiau-hū」、「僥險 hiau-hiám」、「僥雄 hiau-hiông」等等，攏是真精彩，實用个詞。可惜咱會曉--得个 賰無兩、三个囉。
「僥雄」台日典解說做「薄情、無情」，例句：「朋友交陪毋通僥雄」、「迄个查某真僥雄」。
教典 hiau-hiông 寫做「梟雄」，伊延續董忠司教授主編《臺灣閩南語辭典》个解說：「強悍兇狠狡詐的領袖人物」。問題是董教授迄本辭典另外有收「僥雄 hiau-hiông」，解說是「兇狠無情的」，這正是咱口語講 hiau-hiông 定定咧用个意思。
教典干焦收古文言詞「梟雄」，無收著咱台語口語詞「僥雄」，無妥當。設使伊無欲採用「僥雄」个寫法，干焦欲寫做「梟雄」，按呢解說嘛著修正一下，著愛分做兩个義項，一个是日常用法，一个是文言解說。咱生活中所講个 hiau-hiông 佮「領袖人物」哪有 tī-tāi，而且嘛毋是做名詞用！
教典附錄俗語：
老的老步定，少年的較懂嚇。
Lāu--ê lāu-pōo-tiānn, siàu-liân--ê khah táng-hiannh.
解說：老人家較持重，少年人比較莽撞。
但是咱看台日典，伊有分收 táng-hiannh 佮 táng-hiánn 兩詞條，音雖然接近，但是意思完全無仝，táng-hiannh 是著生驚，táng-hiánn 才是莽撞、輕率、心浮氣躁、容易失察覺迄種意思。
我拄才聽著老歌仔戲演員即句俗語就是講 táng-hiánn，毋是教典个版本。
即句俗語尾仔个講法，蕭藤村老師个冊《臺灣話俗諺語典》有收足濟版本，差佇尾幾字有足濟變化：
táng-hiánn
tánn-hiannh （前字是膽）
tah-hiannh
íng-iánn
kánn piànn-miā
雖然伊無收教典講法，但是論真咱欲講「少年--ê 較táng-hiannh」毋是袂使，總--是若欲按呢唸，袂使解說做〔少年人比較莽撞〕，著解說做〔少年人比較容易驚慌失措〕。
查教典「懂嚇 táng-hiannh」即條兩字詞，一个音就負擔兩種解說：
1.受驚害怕。
2.冒失、莽撞。
濫做伙無好，著像台日典按呢分別音義較妥當。
演出影片連結佇第一條留言。
教育部臺灣閩南語常用詞辭典（教台典）有收兩个詞「牽尪姨 khan-ang-î」、「牽亡 khan-bông」，照伊解說，兩个等一是同義詞：
牽尪姨：[動]降靈術。靈媒讓亡魂附在自己身上，而能跟生者溝通的一種法術。
牽亡：[動]由靈媒牽引死者的亡魂來與生者見面或者對話。
扑算一般百姓是按呢咧混用即兩个詞，不而過，按照從事牽亡歌陣个專業人士林宗範先生所講，「牽亡」是指怹咧做个儀式佮表演，是佇喪事个時，牽新亡行過地府路關去到十殿，毋是「牽尪姨」是將亡魂牽轉來陽世佮親儂講話啦。
牽尪姨也叫做「觀尪姨 kuan-ang-î」，教台典即个動詞 kuan 是用「關」字，伊收个詞有「關童 kuan-tâng」、「關落陰 kuan-lo̍h-im」。
我一直無清楚到底寫「觀」較好，抑是寫「關」（唸文言音 kuan，毋是白話音 kuainn / kuinn），教台典其實是延續臺日大辭典个寫法。
看著有先進分享一句俗語，漢字「鈍刀使利手」，伊標音是 Tūn-to sái lāi-tshiú.
但是臺日大辭典「鈍刀」是唸 tun-to，例句「鈍刀出利手 Tun-to tshut lāi-tshiú」。
陳修先生《台灣話大詞典》也是 tun-to，毋是 tūn-to，而且陳修典p.1952有明白解說：「器不利曰鈍 tun，智不敏曰鈍 tūn」，伊講个「智不敏」包括無敏捷，像「跤手慢鈍[bān-tūn]、跤鈍手鈍 kha-tūn-tshiú-tūn」，陳修先覺个解說、分別，佮我个理解仝款。
陳憲國、邱文錫兩先生《新編華台語對照典》p.882 也是唸 tun-to：「鈍刀使利手 Tun-to sái lāi-tshiú」。
但是董忠司教授《臺灣閩南語辭典》p.1399，以上「鈍」字兩義兩音就合一音矣，攏唸做「tūn」。陳修典「刀鈍皮韌 to tun1 phuê lūn」，董辭典所收類似个俗語唸法是「刀鈍毋是肉韌 to tūn7 m̄ sī bah jūn」。
教台典也是延續董辭典無分个唸法，伊有收「鈍刀」即个詞，就唸做 tūn-to。
我認為唸 tūn-to 是受華語「鈍」字一律唸 ㄉㄨㄣˋ 个影響，致使分袂清楚「鈍」佇台語本底有勾破音。
補充：這可能有腔口差，也有前輩講伊細漢就聽儂講是 tūn-to，但是到底 tun-to / tūn-to 个講法按怎分佈，目前並無清楚。
台語「秋凊 tshiu-tshìn」，也有儂講 tshio-tshìn，有幾種意思：
1. [形] 涼爽。例：樹仔跤有蔭[ńg] 較秋凊。
2. [動] 納涼。例：日頭真炎，咱來去樹仔跤秋凊。
3. [形] 變較涼冷，予儂感覺略仔寒[kuânn]。例：今仔日較秋凊矣，著加疊[ke tha̍h]--一領。
4. [形] 身體安適（時常用佇否定句）。例：毋知按怎，儂無啥秋凊。
教典干焦寫第一義。
台語「始」字，無論是漳泉廈台个韻冊字典攏只有 sí 一音，對應中古音反切 《廣韻》《正韻》詩止切，《集韻》《韻會》首止切，也證實即字無分文白，台語攏干焦唸 sí，無唸 sú。「停止」个「止 tsí」字無 u 韻母个讀法，「始」字也無 u 韻母个唸法。
所以「開始」就唸做 khai-sí，並無唸做 khai-sú。「開」字有「文 khai、白 khui」兩音，「始」字只有一音 sí。
若是按呢，是按怎一大堆儂「原始」即个詞个台語，怹攏講做
guân-sú，毋講 guân-sí？
這是錯誤類推个結果，因為常用字「死」字有文音 sú，白音 sí 个對應關係；「四」字也有文音 sù、白音 sì 个對應關係，怹不知不覺，煞掠叫「始」字也有 sú、sí 个文白對應關係。
另外也有儂主張「始」字唸 sí、sú 兩音是腔口差，就親像「台語」有儂講 Tâi-gí，有儂講 Tâi-gú 按呢。這嘛毋著。「始」若有即種腔口差，反切下字「止」字嘛應該有 tsí、tsú个腔口差，事實無，無論啥乜腔，「止」字只有唸 tsí。
「始」台語自底只有一音，無分文白、無分漳泉、無分勾破。
無論是「開始 khai-sí」、「原始 guân-sí」抑是「元始天尊 Guân-sí thian-tsun」个「始」攏只有 sí 一音。
可惜，毋但《新編華台語對照典》認為「元始天尊」个「始」有sú、sí 兩種讀法，連教育部台語辭典「始」个單字音，伊嘛分做白話音 sí、文言音 sú 兩音，但是教典所收三个有「始」字个詞，伊攏唸 sí，無唸 sú：
開始 khai-sí
原始 guân-sí
創始 tshòng-sí
若照教典「始」單字正實有「文唸 sú、白唸 sí」个分別，請問以上即三个詞攏是白話詞--hioh？是按怎書面語「創始」毋唸 tshòng-sú，愛唸 tshòng-sí 咧，唸 tshòng-sí 毋是真歹聽？袂輸是「創死」咧？
「開始 khai-sí」毋是「該死 kai-sí」，只有一音个「始」字佮「死」白話音仝音無錯，但是咱毋通因為共音就想歪去，咱愛有平正心。
會記得我少年个時，一擺阮老爸𤆬我去揣醫生，掛號个時伊講我姓潘[Phuann]，名「科元 Kho-guân」，「科學」个「科 kho」，「元始 guân-sí」个「元 guân」。伊並無亂想對「死 sí」个意思去，來刁工將「元始 guân-sí」唸做袂輸較好聽个 guân-sú。
我知影當今多數台灣儂，若欲叫伊唸「原始、元始」个台語，後字伊一定是唸 sú 較濟。一个錯音 濟儂講，就變俗音，俗音通行久，也變教典正音。
事實「始」字本來並無 sú 个唸法，唸 sú 是現代俗音。現代俗音我也毋敢否定伊，才袂予左派進步人士批判講我是佮社會脫節个正音魔人。總--是我想欲佇遮將伊演變个因端起理[in-tuann khí-lí]交帶予清楚，來記念先父當年佇日常生活中，隨機教育，將「元始」个正音傳教[thuân-kà]予我。
補充：「之」字台語也是只有一音 tsi，但是野台歌仔戲特別愛唸做 tsu。一方面也是錯誤類推，一方面可能是因為感覺 tsi 會聯想對女性器官去，歹聽，所以刁工改唸 tsu，這也是心肝無平正所致。設使 tsi 歹聽，請問水果名「荔-tsi」是毋是愛改唸做「荔-tsu」才好？
台語講【無才 bô-tsâi】，毋是「無才調、無才能」。「無才調」是無能力、無本事，但是「無才」是舉止輕浮、無穩重、〔吊兒郎當〕。
詞目「無才」目前教典無收，只列佇「才」字做例詞，但是伊煞將「無才」解說做〔沒本事〕，按呢毋著。
教典附錄俗諺：「搖人無才，搖豬無刣。」伊解說做〔搖擺不穩重的人，多無才氣；搖動不穩的豬，多為病豬，不可殺來食用。比喻人要穩重堅定。〕看起來也是將「無才」理解做「無才氣」，按呢猶原毋著。這是看著台語漢字，望文生義个結果。
教典个編寫者大概是將台語「無才 bô-tsâi」聯想對文言文「女子無才[bû tsâi]便是德」个 bû tsâi 去做解說。
無論查埔查某，若予儂講 bô-tsâi，就毋是好對象，哪有可能「便是德」咧？
我做囡仔个時，有時佇咧佯痟六顛[tìnn-siáu-la̍k-tian]，就會予阮阿母罵講「無才-hinn-hinn」，這是「無才」个加強型。
台語動詞【請 tshiánn】教育部台語辭典收三義：
1. 邀約。例：請你來𨑨迌。
2. 懇求、拜託。例：請你讓予我過一下。
3. 一種表示客套的習慣性用法。例：請你多多指教。
咦，按呢「即頓我請」、「下暗來予我請」个「請」咧？
無在內！
「假使 ká-sú」即个詞，本底是較文言个講法，但是現代台語儂足愛講，尤其是八點檔台語齣个演員逐家不時講，而且攏走音變做 khá-sú，即種講法相信就是現時社會上多數儂所講个。
走音就走音去矣，只要是台語本身自然演化出來个音變，原則上我袂排斥，若是予北京話帶衰个呼音我就較不滿，因為前--者顯明台語繼續咧生湠个活力，後--者顛倒是台語踏入死亡界線个歹吉兆。
一部規範性兼客觀性記錄語言个辭典（像教育部台語辭典）「假使」即个詞，上好兩音攏收，標記做：
【假使】ká-sú 俗唸作khá-sú
總--是，目前教典只收 ká-sú 一音，無反映出語音事實。
毋知這有算 #教典掠包 無？
「假使汝欲去，我就載汝laih（來去）」即種講法傷激體[kik-thé]，咱平常時仔只要講「汝若欲去，我就載汝laih」就好矣啦！
若是「假使咱繼續講台灣是一个國家，伊个名叫做中華民國，按呢台灣早慢就愛佮中華人民共和國統一，因為『一个中國』已經是全世界个共識」，即種話講「假使」就有得體，不而過，講「咱若…」、「若是咱…」、「若準咱…」仝款會用得。（補充：閣有「設使 siat-sú」是台語文語。）
台語 liōng-sīng，漢字寫做「冗剩」，像「烏白買！汝錢真冗剩喔？」、「物資欠缺，無thang予咱冗剩用」。
liōng-sīng 即个詞後字韻母受著前字韻母同化，真濟儂唸做 liōng-siōng，這咱也尊重。問題是教育部台語辭典干焦收 liōng-siōng 一音，無收 liōng-sīng 个舊音，咁講全台灣已經攏無儂講 liōng-sīng 矣？
補充：教會公報个白話字文獻，查有八篇寫著 liōng-sēng（就是台羅 liōng-sīng），但是一篇 liōng-siōng 都無。
「索」字台語實際使用，有白話音 soh，佮文言音 sik 兩音。唸 soh，就是指具體个索仔（華語講〔繩子〕），抑是對索仔个概念引申出來个抽象名詞，像「線索 suànn-soh」。
但是「索」若做動詞，表示「求討」抑是「搜揣 tshiau-tshuē」个意思，照過去个詞例，攏是唸文言音 sik，像臺日大辭典有收幾若个「索 sik」个詞：
1.「求討」義：【詐索 tsà-sik】、【藉索 tsià-sik】、【勒索 lik-sik】（文語唸 li̍k8-sik）、【酷索 khok-sik】（文語）。
2. 「搜揣」義：【索引 sik-ín】、【搜索 soo-sik】。（即兩个詞台日典攏標明「國」字，也就是來自日語漢字詞。）
教育部臺灣閩南語常用詞辭典（教典）也有收【檢索 kiám-sik】佮【索引 sik-ín】。
既然按呢，是按怎教典【探索】煞標音做 thàm-soh 咧？這是明顯个錯誤，應該唸 thàm-sik 才合理。「探索」詞內个「探」佮「索」攏是動詞，這是類義並列複合動詞，毋是動賓複合詞。
補充：
水滸傳第24回：『次日清早，王婆收拾房裡乾淨了，買了些線索，安排了些茶水，在家裡等候。』迄个「線索」是具體个針線迄類个物件，但是現代台語無用做具體意思，古早台語可能有，臺日大辭典「線索」个第一義項是「線佮索仔」。
現代台語「線索」已經佮台灣華語「線索」用法完全仝款矣。但是台日典「線索」除了具體義，閣有兩種解說真心適，而且攏佮現代用法無仝：
② 賄賂[hué-lōo]：例詞【下線索 hē suànn-soh】
③ 中間媒介、紹介者：例句：Tāi-tsì若無人牽線索 tsiū buē成。
教育部台語辭典【藃蟶 hiauh-than】个音檔錄了無好，有幾若位台語界朋友講：聽起來是唸 siauh-than。
我贊成伊呼音失準，應該重錄。伊咧唸 hiauh-than 个聲母 h- 个時，tíng-kiunn（上顎）佮 ē-kiunn（下顎）傷過合倚來，致使空氣經過喙空个通道个時，對 tíng-ē-kiunn 个摩擦傷大力，致使聽起來袂自然。
總--是，伊唸 hiauh-than 迄種 h 聲母音猶原佮 siau 个聲母 s無仝。伊唸 siau 个聲母 s 个時，有氣流閣較集中、強烈，咧摩擦舌尖个氣音。請比較伊：
「數單 siàu-tuann」
https://twblg.dict.edu.tw/holodict_new/result_detail.jsp?n_no=11164&curpage=2&sample=siau3&radiobutton=1&querytarget=1&limit=20&pagenum=5&rowcount=94&fbclid=IwAR0atsQzcUK10p0qq-wJ4BlDSR5drKCj3xh9LNoFzYR9EeXy86IqztyHBgQ
佮「藃蟶 hiauh-than」
https://twblg.dict.edu.tw/holodict_new/result_detail.jsp?n_no=12648&curpage=1&sample=hiauh-than&radiobutton=1&querytarget=1&limit=20&pagenum=1&rowcount=1&fbclid=IwAR26HRhBSmkKmGlFzLgkuoCL8jyzPZKRmLoRsftpwWu3lTfYg-RCLqAyk0Y
----------
詞目 圈仔
音讀 khian-á
釋義
1.掛在物體上的環扣。例：門圈仔 mn̂g khian-á(門環)、桶圈仔 tháng khian-á(桶邊的提環)。
2.一種麵粉製的食品。呈扁平狀，通常無餡。
----------
第一个義項攏唸做 khian，但是第二義項，目前台灣較濟人講 khan、khan-á，所以標音應該補添 khan 的音。
而且釋義無完整，暫時建議補充做：『糯米粉或麵粉製的一種紅色系民俗食品。呈扁平狀，上面印有成串古錢的圓圈形紋路，通常無餡。常用於拜天公、財神的供品。俗寫作「牽仔」。』
或者是將「牽仔」當做第二義項个異用字。
以上教典「檔」字只收一音，上聲 tóng，這是受台灣華語不良影響(=帶衰) 所致的唸法。
「檔」字中古音反切有平聲、去聲兩讀，並無上聲的唸法。閩台語舊韻書字典「檔」字也有陰平聲 tong、陰去聲 tòng 兩調，符合中古音，實際民間日常應用一向慣勢唸陰去聲 tòng，一直到當今電視台用台語咧講「八點檔」也是唸 peh/pueh-tiám-tòng，毋是唸 peh/pueh-tiám-tóng。
連中国普通話「檔」字也是唸去聲，像「檔案」是唸 ㄉㄤˋ ㄢˋ，毋是台灣華語 ㄉㄤˇ ㄢˋ。
台灣華語因何將「檔」錯唸做 ㄉㄤˇ 咧，拍算是將「檔」掠做是「擋 ㄉㄤˇ 」的仝音字所致。
但是台語「檔」本來就佮「擋」仝音，攏是 tòng 啊！「檔」字教典無應該採用 tóng 這號受台灣華語影響，無根據个現代走音當做唯一正音。若無，「網路」嘛愛採用 báng-lōo（蠓路）做台語正音啊！
（註：「擋」字甘字典有收 tóng、tòng 兩音，但是「擋」字咱生活口語攏講 tòng。）
阮叔伯小弟，完全無台語音韻學智識，伊嘛自自然然講 tòng-àn。「檔」字唸去聲 tòng，這是現代台語通行音，也是閩、台傳統正音，也符合中古音反切，一脈相傳，教台典無理由毋採用，煞賭強欲去配合台灣華語的走音，這毋是正確合理的台語傳承教育！
頂面教典六筆錯音應該改做：
---
1 檔 tòng
2 檔案 tòng-àn
3 高檔 ko-tòng
4 檔期 tòng-kî
5 檔名 tòng-miâ
6 存檔 tsûn-tòng
---
以下列出「檔」的字書資料，顯明「檔」字自古無唸上聲，現代閩、台語也無唸上聲。
「檔」中古音：
《唐韻》《廣韻》《集韻》《類篇》都郞切，音當。
《類篇》登浪切，當去聲。
《集韻》下浪切，音讜。
「檔」閩、台舊字書：
《彙集雅俗通十五音》：「公」上去聲、「貢」字韻、「地」字頭（tòng）。
《彙音寶鑑》：1. 公一地（tong）。2. 公三地（tòng）。3. 褌七他（thn̄g）。
《廈門音新字典》：1. tong。2. tòng。3. thn̄g。
「檔」現代台語音：
《臺灣話大詞典》：tòng，例詞句：公文歸檔 kong-bûn kui-tòng、檔案 tòng-àn、檔案室 tòng-àn-sit。
《臺灣閩南語辭典》：(文) tong3, tong1 (白) thng7。例詞：檔案 tong3 an3、檔案室 tong3 an3 sik4。
「檔」現代閩南音：
《闽南方言大词典》：tɔŋ⁵。（=台羅 tòng）
《當代泉州音字彙》：dong⁵〖檔案〗dang⁵〖空檔〗。（dong⁵ = 台羅 tòng、dang⁵ = 台羅 tàng）
《閩南話漳腔辭典》：dong⁵。（=台羅 tòng）
---
詞目 往往
音讀 íng-íng
釋義 每每、經常。例：這款代誌往往會發生佇伊身上。Tsit khuán tāi-tsì íng-íng ē huat-sing tī i sin-siōng. (這種事經常發生在他的身上。)
異用字 永永
---
台語 óng-óng 就是 íng-íng，文白音的差別。台日典兩音攏有收，而且註明是同義詞，不而過伊是分寫做「往往」佮「永永」。
教典寫「往往」干焦取白音 íng-íng（閣將「永永」列做異用字），無收 óng-óng 的音，這無妥當，因為當今的台語人較濟是講 óng-óng，而且看著漢字「往往」欲唸做 íng-íng 會有心理障礙。
教典「往往」有必要補收一音 óng-óng。（但是補收 óng-óng 了後，異用字欄「永永」著愛註明是針對 íng-íng 唸法的異用字，體例上按怎處理，我無清楚。）
但是 íng-íng 會使講單字 íng，例：
俗語講，「捷看尻川，íng會一擺跋落礐。」
單字 óng 就無這種用法。
台語白話 "pùn"，細漢个時，阮對即个單字詞个語感，時常指肥料（主要是用堆肥法做成个肥料）。但是教台典即字 pùn（漢字寫「糞」） 煞無收即種意思。伊干焦有：
------------------
詞目 糞 部首：米 119-11-17
音讀 pùn
釋義
1.排泄物。
2.指垃圾。例：糞埽 pùn-sò(垃圾)。
又見音 hùn
------------------
兩个義項攏是將 pùn 當做無愛挃个廢物爾爾，這若毋是受漢字束縛所致，就是都市倯寫个釋義。
例：像果子皮，䆀个菜葉仔，這著毋通當做 pùn-sò 擲㧒捔，會用得留咧做 pùn。（"pùn" 是肥料，"phun" 是飼料，毋通濫做伙。）
"pùn" 毋是 "pùn-sò" ！糞堆 毋是 糞埽堆 啦！
補充：
"pùn" 是多義詞，本義是大腸个排泄[siat]物，所以兩字詞 pùn-kháu（糞口）是指肛門，但是 "pùn" 單字有引申指「肥」，這佇生活中顛倒較捷用著，也有袂少包含 "pùn" 个兩字詞、多字詞是指「肥」，包括【落糞 lo̍h-pùn】、【壅糞 ìng-pùn】、【糞堆 pùn-tui】、【塗糞 thôo-pùn】、【大糞 tuā-pùn】。
不過，"pùn" 佇複合詞內底也有引申做「廢棄物」个用法。
pùn-sò 个 sò 到底是啥？若 sò 个本字確實是「埽」，按呢「埽」是 hiat-ka̍k（《說文》埽：棄也。）該hiat-ka̍k个pùn，就是廢棄物。
另外，咱看台日典个寫法，pùn-táu 伊寫做「糞斗」（閣有同義詞「糞且 pùn-tshiánn」），按呢可能比教典寫做「畚斗」較合理。因為「畚」是唸 pún，毋是唸 pùn，咱袂使得凊凊彩彩就用「一音之轉」來解說過去。"pùn-táu" 是漢文「畚」个意思，無表示 pùn 就是「畚 pún」字走音去个結果。咱講 pùn-táu 較合理个分拆是「收集 pùn 个斗」，即个 pùn 無限定指肥。
教育部台語辭典一寡佮華語同形異義个兩字詞：
1.【客人 kheh-lâng】：是客家人，毋是賓客、顧客。後者台語講【人客 lâng-kheh】。
2.【昨日 tso̍h--ji̍t】：是華語〔前天〕，毋是〔昨天〕。
3.【細膩 sè/suè-jī】：1. 小心。2. 客氣。
4.【無疑 bô-gî】：不料、想袂到，毋是華語〔無疑、無疑地〕。
5.【大家 ta-ke】：翁婿个老母。
6.【大官 ta-kuann】：翁婿个老爸。若唸 tuā-kuann 才有指官位大个儂（教台典無收著即个音義，但是方音表有收 tuā-kuann-á 是宜蘭漳腔，指翁婿个老爸。）
7.【大漢 tuā-hàn】：教台典解說：① (形) 身材高大。② (動) 長大。③ (形) 年長的。排行在先的或較年長的。教國典〔大漢〕解說：『① 身材高大的男子。② 對中國、漢代或漢族的尊稱。』
8.【倒手 tò-tshiú】：〔左手〕。比較教育部國語辭典〔倒手 ㄉㄠˇ ㄕㄡˇ〕解說：『① 從這一手換到另一手。② 貨物的轉手買賣。』
9.【正手 tsiànn-tshiú】：〔右手〕。華語〔正手〕是順方向攑球桮（球拍）个姿勢。
10.【走路 tsáu-lōo】：台語「走」是英語 run，華語〔走、走路〕是英語 walk。台語「走路」本義是佇路裡奔波，引申常用義是指犯案逃亡。
選舉新聞時常看著〔走路工〕，這台語愛講【行路工 kiânn-lōo-kang】，毋是【走路工 tsáu-lōo-kang】。
11.【見笑 kiàn-siàu】：台語「見笑」是指家己感覺慚愧，無面子；華語〔見笑〕是予儂恥笑。
12.【親情 tshin-tsiânn】：即个詞後字「情」唸白話音 tsiânn个時，是「親戚」个意思，唸文言音 tsîng 才佮華語〔親情〕仝意思。
13.【上水 tshiūnn-tsuí】：即个詞前字「上」唸 tshiūnn 个時，是華語〔汲水、打水〕个意思。佮教國典〔上水〕三个義項攏無仝：『① 河川的上游。② 船逆流而上。③ 為火車、汽船等的發動機添水。』
#台華漢字同形異義詞 歡迎補充
音讀 tshia-puânn
釋義
1.搬來搬去、換來換去，不安定的樣子。例：你真愛捙盤呢，敢會使靜一下？Lí tsin ài tshia-puânn--neh, kám ē-sái tsīng--tsi̍t-ē? (你很喜歡動來動去咧，可不可以安靜一下？)
2.反覆爭論、計較、折騰。例：小可仔代誌爾爾，敢有需要捙盤遐久？Sió-khuá-á tāi-tsì niā-niā, kám ū su-iàu tshia-puânn hiah kú? (小小事情而已，有需要爭論那麼久？)
3.善以奉承的方式與人交際。例：伊真𠢕佮人捙盤。I tsin gâu kah lâng tshia-puânn. (他擅於交際。)
近義詞 盤捙
---------------------------------------------------------
釋義1 是抄自董忠司教授臺灣閩南語辭典的釋義，但是教典撰稿者家己「腦補」生出例句「你真愛捙盤呢，敢會使靜一下？」，而且伊華譯寫「你很喜歡動來動去咧，可不可以安靜一下？」
其實「捙盤」毋是單純指這種具體的身體動作，是較抽象的描寫，類似「大費周章」的意思，像台日典例句（照伊用字）：「嫁娶車盤真費氣」、「大車盤大落氣」按呢才著。
俗語「大捙盤大落氣」的「大捙盤」是進一步引申，指婚喪喜慶的時「大張旗鼓、大事鋪張」，也有講【大捙夯 tuā-tshia-giâ】、【大鋪排 tuā-phoo-pâi】。
釋義3 是抄自陳修先生台灣話大詞典，但是這種用法我毋捌聽過，毋知各位先進有按呢用無？這種意思較捷講【盤撋 puânn-nuá】。
補充：囡仔【過動 kò-tōng】，咱口語講【捙蛆 tshia-tshi】，袂輸一尾蟲佇遐【捙跋反 tshia-pua̍h-píng】。〔動來動去、動個不停〕也有講【蟯嗤喳 ngia̍uh-tshi̍h-tshā】、【蟯蟯旋 ngia̍uh-ngia̍uh-suan】。
台語【行徙 kiânn-suá】雖然有華語〔走動〕个意思，但是主要是指「散步」，「四界行徙」就是指「四界散步、行跤花」。教典例句煞接落去寫講「敢若真無閒」，按呢意思就走爭去矣啦！
廈英大辭典 p.452 對「來行徙」有一種特別个解說：
kiâⁿ-soá, to take a walk for exercise or amusement. lâi kiâⁿ-soá, come away with me for amusement; often means, come and visit bad houses.
（「行徙」，為著運動抑是逍遣去散步行路。「來行徙」，佮我來去逍遣；時常指來去行花間。）
https://www.facebook.com/khoguan/posts/2088154837909200
台語【卸貨 sià-huè】是將貨物俗賣出清，毋是華語〔卸貨〕，華語〔卸貨〕台語有講【落貨 lo̍h-huè】。
若是【卸俗貨】就有雙重解說：「卸+俗貨 sià sio̍k-huè」（俗貨共伊卸--出去，mài閣囤咧鎮tè）；「卸俗+貨 sià-sio̍k-huè」（減價thang緊賣出去的貨）。「卸」、「卸俗」攏是動詞。閣有講「摒貨底、卸俗價」（piànn huè-té, sià-sio̍k-kè）。
這有儂理解做「削 siah」，可能是認為減價親像用刀仔將價數削予薄、削予變少，華語也有講〔削價競爭〕，但是過去的台語文獻毋是按呢寫，我的語感也毋是削。
不而過，雙方拚輸贏有講【對削 tuì-siah】，「毋免tshuah，佮伊削！」。
教典「削」第四義：
---
[動]挖苦、使人難堪、丟臉。例：削人的面子 siah lâng ê bīn-tsú(讓人家丟臉)。
---
恐驚有問題，新編華台語對照典寫「卸面子」較著。閣像【相卸 sio/sann-sià】、【卸祖公 sià tsóo-kong】、【卸世眾 sià-sì-tsìng】、【卸世卸眾 sià-sì-sià-tsìng】、【當面卸--人 tng-bīn sià--lâng】（台日典攏有！）。
高級台語詞 ka-lí-lian、ka-lí-lô、ka-lí-lian-lô
三个詞仝意思，人問咱代誌做好未？代誌進行了按怎？咱按呢應[ìn]，就是欲表示猶未咧、閣早咧！也簡單講做
「ka-lô啦！」
彼種語境就是類似華語欲回答講〔八字還沒一撇呢！〕
教育部台語辭典寫做：
咖哩嗹、咖哩囉、咖哩嗹囉[ka-lí-liân-lô]
彼个「咖哩嗹囉」的「嗹」教典標音是第五聲 liân，恐驚有問題，因為三字詞 ka-lí-lian 尾字是唸本調第一聲，按呢四字詞 ka-lí-lian-lô 的第三字iá是標做第一聲就好。
教典「咖哩嗹囉」的解說佮例句：
[動]傀儡戲正式開演前連續敲打的響鑼。引申為開始。
例：未咖哩嗹囉咧。Buē ka-lí-liân-lô--leh. (八字還沒一撇呢。)
問題是「傀儡戲」一般講 ka-lé-hì，毋是 ka-lí-hì，但是 ka-lí-lian-lô 是講 lí 毋是 lé，按呢這个成語的語源敢誠實是來自「傀儡戲」？這是毋是教典牽強附會[khian-kióng hū-huē]个解說？
而且咱看舊辭典，像廈英典、台日典，閣有一寡較舊的台語文獻，ka-lí-lian-lô 本身就已經包含有否定的概念，廈英典就解說做 "not yet; not yet finished; yet distant; wide of the mark." 所以照舊底个用法，〔八字還沒一撇〕只要講 "ka-lí-lian-lô！" 就有夠矣，頭前免加「未」字。
但是現代工具冊新編華台語對照典也是佮教典仝款，頭前有否定詞，寫做「猶未佳哩連囉」，毋知是用法傳了走爭去，抑是進一步的加強講法？
總講一句，ka-lí-lian-lô 這个目今無啥人會曉講的高級台語詞，教典的標音、解說、例句攏有閣研究參詳的空間。
（註：食物名「咖哩」有人講 ka-lí，有人講 ka-lé，但是「傀儡戲」攏講 ka-lé，無講 ka-lí。另外，台灣一部份漢人將原住民叫做 ka-lé，這佮「傀儡戲」應該是無仝語源，雖然也有人共伊牽做伙來解說。）
華語名詞〔相片〕，台語有幾若款講法、唸法，一字的講法至少有 siòng、siàng、siōng 三種。若是華語動詞〔照相、拍照〕，台語閣愈濟變化，像 hip-siòng、hip-siàng、hip-siōng、hìm-siàng 等等。
教典「翕相」的標音是「hip-siòng 又唸作hip-siōng」，將兩種唸法當做是「翕相」的讀音，這是錯誤的歸併，因為講 hip-siōng 的人，其實毋是欲唸「相」字的音。
「相片」的「相」是第三聲，泉腔唸 siòng、漳腔唸 siàng，但是名詞講 siōng、動詞講 hip-siōng 的人，是欲用「像」來表示「相片」的意思，「像」才是第七聲 siōng 所對應的漢字。講 hip-siōng 的人，欲寫漢字，著寫「翕像」才著。
單字「像」表示相片，台日典就有收在內矣，是列佇第二義項，日文解說是「寫真」（名詞），例詞有「翕像、此[tsit]張像」，若是第一義項的日文解說是「像、肖像」，例詞有「形像 hîng-siōng」、「偶像 ngóo-siōng」、「佛像 pu̍t-siōng」、「拾像 khioh-siōng」。
最後彼个例詞 khioh-siōng 真心適，當時是指職業的畫人像[jîn-siōng]，也就是講毋是到西洋人發明寫真機，台語才開始用「像」來指平面人像，佇早前閣用人工來「記錄」人像的時代，台語人就按呢用矣。
人工抾像，發展到機器寫真的過渡時期，有真濟人較佮意提家己抑是先人的烏白大頭像，去予抾像師傅畫做幼路的彩色油畫，穿插、姿勢、家具、背景攏會使加工予較有藝術感、古典感。了後掛踮廳頭，做囝孫後代永遠的數念。
(補充：khioh-siong7後來也指修底片，細漢个時阮兜隔壁就是翕像館，我定定看著頭家咧khioh-siong7。)
教典將 hip-siōng 當做「翕相」的又音，真無通，這會予正音主義者認定阮所講的 hip-siōng 是訛讀爾爾。
也有先進主張：「雕像、塑像的像接近[立體]，若是翕相是接近[平面]，若錄影[影像]算是[立體]。」
所以伊認為台語「翕像 hip-siōng」袂通，「翕相 hip-siòng/siàng」才會通。
但是咱研究台語，無應該完全遵照通用漢文的詞義思維，台語人有家己引申擴充的詞義。
我的解說觀點：人各有其「相」，「像」是人相的模仿物，無分立體抑平面。翕眾生相予伊成像，無論講做翕相抑是翕像攏是合理的造詞。
許地山（1894-1941），台南人，新文學名作家，伊攏是用北京話文創作，總是伊的文字拄著=仔也會出現台語人的詞義，像小說〈三博士〉有寫：
「（名片）後面還印上本人的銅版像：一頂外國博士帽正正地戴著，金繸子垂在兩個大眼鏡正中間，臉模倒長得不錯，看來像三十多歲的樣子。」
其中的「像」、「臉模」攏是台語思維，毋是北京話，「像」是指平面的「相片」，「臉模」是對正台語「面模」變出來的，北京話無按呢用。
留言
張貼留言