大漢學台語个心態
大漢學台語个心態：
真濟中年台灣儂，聽著怹袂曉得个台語話句、語詞，第一反應攏是，這穩當是別位个腔口，毋是阮遐个話，毋知 無差。
但是我个態度是：台語前輩个話，我又閣有一項學無著，趕緊趁即个機會共伊抾轉來。尤其是迄个語詞，若會凍予我个台語講了閣卡幼路、媠氣，按呢無學 袂使--得！（我遮毋是咧討論仝一字个無仝腔口）
例一：華語〔一根香蕉〕个台語，我細漢佇厝裡干焦聽過「一條弓蕉」个講法，後來才知影有講「一只[jí/gí]弓蕉」。「條」用途卡包含，無像「只」遐爾幼路。
例二：俗語「媠[suí]，媠無十全[tsa̍p-tsn̂g]；䆀[bái]，䆀無ka-nn̂g」。ka-nn̂g 是「規个、完整、全然」个意思。即句話是講世間無絕對个媠䆀（美醜）、好歹。我佇冊裡學著即句話，二十幾年後，有一遍轉去故鄉，才親耳聽著阮大姨佇生活中講出來。
我若一開始就想講我細漢是講台語大漢个，所以阮遐个話我定著會知，煞認定「tsa̍p-tsn̂g」啦、「ka-nn̂g」啦，閣有即句俗語，攏是別位才有个話，按呢咁毋是一錯二十冬？
例三：「卡輸分數 khah-su-hun-siàu」（「數」愛唸白話音 siàu，毋是 sòo，hun-siàu 指小可仔量）是我佇台日大辭典學著个，伊个解說是親像「略遜一籌 lio̍k-sùn it-tiû」，也就是字面上「卡輸淡薄仔」迄款意思。
即个成語，幾若年後我才佇無意中聽著阮阿姑講著，伊用佇「閣卡按怎比，嘛差儂一氣[khuì]，綴儂袂著」个情形，予即个四字詞加添一層tshinn-tshioh个意味。我若毋是有先讀過，阮阿姑紲喙細聲仔講，我無可能注意著；有先讀著，閣再聽著，規个印象佮感受完全無仝款！
讀台文，對學台語个幫助有偌大，毋是無下過工夫个儂設想會到个。干焦聽佮講个語言，佇現代社會註定會予聽講讀寫四種齊備个外來語言消滅，咱个母語勿[mài]講新語詞無才調生湠，連舊話嘛一直死失去。
留言
張貼留言