台語文言白話對照諺語
常用文言諺語，台語無一定有對應个俗語，彼原則上只要照字唸台語文言音來講就好，本系列是針對一寡有倚意个文白諺語來收集。
001.
近朱--者赤，近墨--者黑。
Kīn/kūn tsu--tsiá tshik, kīn/kūn bi̍k--tsiá hik.
佮好儂行，有布通經；佮歹儂行，有囡通生。
Kah hó-lâng kiânn, ū pòo thang kenn/kinn; kah pháinn-lâng kiânn, ū kiánn thang senn/sinn.
002.
成事不足，敗事有餘。
Sîng-sū put tsiok, pāi-sū iú û.
生雞卵--个無，放雞屎--个一大堆。
Senn ke-nn̄g--ê bô, pàng ke-sái--ê tsi̍t-tuā tui.
（後半句也簡單講做「放雞屎--个有」）
003.
長江後浪推前浪。
Tiông-kang hiō-lōng tshui tsiân-lōng.
汝會老，我會大。
Lí ē lāu, guá ē tuā.
004.
玉不琢，不成器；人不學，不知義。
Gio̍k put tok, put sîng khì; jîn put ha̍k, put ti gī.
芥菜無剝毋成欉，囡仔無教毋成儂。
Kuà-tshài bô pak m̄ tsiânn tsâng, gîn-á bô kà m̄ tsiânn lâng.
005.
天下無難事，只怕有心人。
Thian-hā bû lân-sū, tsí phànn iú-sim-jîn.
有心拍石石成穿/磚，有心開埔埔成園。
Ū-sim phah-tsio̍h tsio̍h tsiânn tshng/tsng, ū-sim khui-poo poo tsiânn-hn̂g.
006.
有眼不識泰山。
Iú gán put sik Thài-san.
真珠看做老鼠屎。
Tsin-tsu khuànn tsò niáu-tshí-sái.
007.
知人知面不知心。
Ti jîn ti biān put ti sim.
儂心隔肚腹，僫得料。
Lâng-sim keh tōo-pak, oh-tit liāu.
#台語文言白話對照諺語 008-014
（聲明：文、白話句意思用法無可能全然對應，請活用。）
008.
書到用時方恨少。
Su tò iōng sî hong hūn siáu.
讀書一斗籠，考校挐氅氅。
Tha̍k-tsu tsi̍t táu-láng, khó-kàu jû-tsháng-tsháng.
四書五經讀透透，毋捌黿鼇龜鼈竈。
Sù-su ngóo-king tha̍k-thàu-thàu, m̄-bat guân-ngôo ku-pih-tsàu.
009.
事非經過不知難。
Sū hui king-kò put-ti lân.
看俺公食雞胘，脆脆。
Khuànn án-kong tsia̍h ke-kiān, tshè-tshè.
010.
學如逆水行舟，不進則退。
Ha̍k jû gi̍k suí hîng tsiu, put tsìn tsik thè.
三日無餾就𬦰上樹。
Sann-ji̍t bô liū tsiū/tio̍h peh tsiūnn tshiū.
011.
言必信，行必果。
Giân pit sìn, hīng pit kó.
（「行」字照四書集注，讀去聲。）
講會到，做會到。
Kóng ē kàu, tsò ē kàu.
012.
小不忍，則亂大謀。
Siáu put jím, tsik luān tāi-biô/bôo.
忍氣會求財，激氣會相刣。
Lún-khì ē kiû-tsâi, kik-khì ē sio-thâi.
013.
小人之過也，必文。
Siáu-jîn tsi kò--iá, pit būn.
(「文」勾破去聲)
臭尻川，畏儂掩。
Tshàu kha-tshng, uì lâng ng.
014.
多行不義，必自斃。
To hîng put-gī, pit tsū-pè/pē.
捷看尻川，往會跋落礐。
Tsia̍p khuànn kha-tshng, íng ē pūa̍h lo̍h ha̍k.
留言
張貼留言